Dificultá: Fácil.
Percorríu: 8,6 km (ida ). Usu piatonal y cicloturista.
Ruta que sigue el camín tantes vegaes utilizáu por -yos sardineres candasinos, que día tres día percorríen el conceyu de Carreño y los pueblos estremeros llevando sobro les sos cabeces les “paxas” (especie de cestes planes) apinaes de pexe, que vendíen a l'amanecida na Plaza del Fontán d'Uviéu.
El trayectu parte dende la villa candasina, siguiendo el Camín Real Candás- Uviéu, (que xubía a lo alto del Monte Areo), hasta la Ermita de Los Remedios qu'alluga la imaxe de la Patrona Celestial de Carreño, y única Virxe asturiana coronada canónicamente, xuntu cola de Cuadonga. En Los Remedios les sardineres candasines faíen un altu nel so camín pa folgar y orar.
Esta ruta escurre poles parroquies carreñenses de Perlora, Priendes y Quimarán, y nella puédese contemplar: horreos y paneres decoraes al estilu Carreño, molinos d'agua y rodendu, y un bastión defensivu del sieglu XIII (Torruxón de Priendes).