En Perlora atópase la Ciudá de Vacaciones, titularidá del Principáu d'Asturies, con amplies zones verdes, árees recreatives, canches deportives, barbacoes y parque infantil. Xuna sienda piatonal costera conecta toles sableres de Perlora y llega hasta la sablera de Xivares y la desaguada de la ría d'Aboño, llende natural col conceyu de Xixón.

Sablera de Carranques

Sablera semiurbana de sable doráu, d'unos 220 metros de llargor, formada por dos pequenes conches separaes por un puexu y d'aguaxe moderáu. Ye un arenal bien frecuentáu. Dispon de trés accesos piatonales, aparcamientu públicu y gratuitu, serviciu de salvamentu en temporada de baños, dueches y lavapiés y aseos públicos. Na so redolada hai un chiringu.

Sablera de Huelgues

Sablera semiurbana de sable y roca, d'unos 120 metros y agües seles, con una ocupación moderada pel branu. Dispon de dos accesos piatonales, aparcamientu públicu y gratuitu, serviciu de salvamentu en temporada de baños, dueches y lavapiés y aseos públicos. Na so redolada hai un chigre.

Cómo llegar

Puede llegase en tresporte públicu: autobús de la llínea Xixón – Lluanco y tren, con apeaderu na mesma Ciudá de Vacaciones. Pela redolada hai xuna amplia ufierta d'hostelería y agospiamientu, con dos campings.

Un pocu d'hestoria

Al occidente de la sablera de Carranques atópase la isla de Entrellusa, onde s'alcontraba l'antiguu puertu balleneru, documentado dende l'añu 1232. En Perlora taba tamién la Cueva Escura (Coyanca), güei destruyida, colos restos de presencia humana más antiguos del conceyu, del Paleolíticu Cimeru.